近十年冇坐超過十個鐘既飛機啦！今次出差有十萬個唔願意。。。正常應該好開心架。。。至少有得增廣見聞，以前係咁諗既，可能年紀大左冇咁多活力想周圍去啦！ 一條友八個鐘去印度好頂架啦！
為左搵啖飯食唯有死頂！去兩日有時差既地方真係命都比埋佢仲要連做咩都唔知！頂！
先講去程，話說我個國內同事懶叻咁一口拒絕左老闆話黎接我地！佢話要坐火車感受下喎！大佬呀！你估冇行李既咩！佢自己攞住兩件行李加一個袋！唉！算！體驗下啦！
原來佢都唔識點搭。。。撞鬼囉！！ 我地盲鐘鐘出左機場Terminal 2直行就係鐵路站，用售票機買S8綫由Munich Airport 去Hauptbahnhof Central Station（巿中心咩車都有）出火車上番大堂再買飛轉BOB由Munchen Hbf去Miesbach 中途要喺Holzkirchen既月台最前部分轉車（因為要轉果架車好短）結果，用左三個幾四個鐘頭至去到，不過的士真係好貴要成145蚊歐羅由機場去酒店。。。我地而家兩個加埋只係48蚊歐羅，真係平好多，不過都成500港紙架！ 重點係，我地由始至終無需入飛入閘但係冇人問過我地查飛。。。咁！咪好多人唔會買車飛囉？唔明！
十點幾去到酒店全日冇野做，冇鋪頭開，冇牙膏，冇牙刷，冇梳，好彩我有帶，十年如一日，百無酒店！
第二日晏晝至見哂D人，原來夜晚先係戲肉。。。。。。真係想開套戲叫@雪地恐慌@！！！
首先，無啦啦話行山40分鐘！下？？？唔係化？十幾年冇運動唔係咁激呀？？係！吹咩？如是者一行二十幾條顛人就踏雪向山上行，仲要頭帶照路燈，好樣衰！頭十分鐘我開始呼吸急速好似就斷氣咁。。。好想停然後返轉頭。。。但又唔可以咁樣衰架麻，D同事年紀大我好多既都冇野...唯有死頂！ 一路行一路行好似永遠都行唔完既感覺真係比死更難受。。。幾乎斷氣先到達山頂。。。。。間餐廳食晚飯(o_0)，以為之前已經夠哂皮啦！嘩嘩嘩嘩嘩嘩嘩嘩！唔係麻？？？？要坐雪車（具體係一張有幾條木既凳仔有鐵腳有條帶懶係控制咁）自己滑番落山？？？？我初級滑雪都唔係喎！邊似你班死鬼成日玩呀？？？
死啦！果然不出我所料，抄車啦！滑左三分一就以高速飛埋山邊人仰馬翻，左邊身由面至腳眼好痛。。。仲要慘到甩手架車自己滑左落山。。。。賴低我一個黑麻麻夜麻麻喺半山仲落緊雪咁 ---＞ 行。。。落。。。山。。。差小小就嚇破膽。。。經過我身邊既雪車冇一架停得住喺度愛莫能助！ 我唯有自己一步一步行，最多咪行番八個字落山。。。但係只係著左波鞋既我行五步撻一撻，好難向下行。。。好大鑊咁情況起碼要碎步慢慢行1、2個鐘至落到山點算？會唔會凍死喺度架？好掛住吉爸同仔呀！！！救命呀！！
睇住一架架車經過身邊冇停低，心諗陣間所有車走哂得番我一個行落山。。。果種無助、恐懼、絕望真係永世難忘呀！欲哭無淚！
天無絕人之路，有個同事有番咁上下份量既竟然控制倒架車停低。。。我問都唔問就坐上去！！！都未寒完！！！好驚好驚好驚！好彩最後有車停倒！好彩！好彩！感謝主！
鐵路站圖....
矛人搭的.....
房內.....
酒店外....
小鎮市中心的商店... 普遍有幾十年歷史...
落泊的腳印....
窗外雪景好靚....
同事窗外景....
小鎮內意大利餐廳既數十年吊燈....
餐廳環境唔錯.....
餐廳外觀.....
酒店其中一角....
酒店內.... 我房對出既地方....
酒店另一幢....
酒店餐廳....得我一個...
地道腸同硬到暈咸到痺既餅....
酒店外....
淨係買腸.... 仲有貓糧試食.....德國野唔知仔仔愛唔愛....
上到出頂差D斷氣摘左塊葉留念......
山頂餐廳內.....
機場內好貴既腸仔薯角氣水.......
一仆一碌既結果......
http://www.miesbach.de/
其實間酒店都幾靚架....
就係哩條路....
就係哩個鬼玩意攪到我遍體鱗傷.... 如果事前有講我一定打屎都唔去....最多唔撈冒姐!!!!!!
齋睇文字都覺得你慘呀！
回覆刪除跌到腳仔瘀瘀青青陰功，痛屎lor....陰功~
雖然你既經歷幾恐怖，不過風景真係好靚，正！
[版主回覆02/15/2012 08:14:40]風景靚不過好睇唔好食，住喺果度一定悶屎呀！
其實駛唔駛特登上山食飯呀，妳個同事仲衰，有人o黎接都唔鍾意，要自己搭車，黐鬼線，真係戥妳慘
回覆刪除[版主回覆02/15/2012 08:19:35]返黎聽朋友講歐洲佬最愛咁，如果我早知就好！個同事要自己留幾日玩可能因為咁所以想撘火車。。。探路
哈哈！我都剛由Munich轉機回來, 我巳唔記得有幾多次係Munich機場出入, 機場的食物勁貴, 全機場得一餐廳有飯吃，我餓咗白飯多時，一於唔理得咁多，吃咗個HK$170的碟頭飯。
回覆刪除同你一樣，很怕出差，早兩日剛同老細商量, 成功推咗下月歐洲出差任務俾另一同事，但九月個轉我可能推唔到。
雪景雖靚，但極怕凍，情願夏天往歐洲
[版主回覆02/15/2012 08:32:59]我同意大利同事一齊走所以只可以喺過海關外既地方食而且冇理由要佢陪我食唐餐架，不過都見唔倒有飯食。。。我本身係飯筒冇飯食幾日真係好辛苦！哩次我都本來推左攪手，比老闆發現左。。。唔去唔得！景靚又冇朋友家人喺度，冇用啦！
這趟出差真係幾辛苦喎! 依家, 腳上傷勢好返晒未呀!?
回覆刪除[版主回覆02/15/2012 08:35:07]手同腰差唔多啦！腳就仲要小小時間，年紀大係咁上下時間啦！
哈哈...真係好瘀喎 !
回覆刪除[版主回覆02/15/2012 08:35:47]的確係好瘀皮！
你同事都癲癲地，有人接都推！出差真糸幾慘，我都好耐無出，不過下星期日都要去北京2日，好彩我有人接 。^^
回覆刪除[版主回覆02/15/2012 08:38:36]佢之後自己行咪可能係搵我一氣探路囉！去北京有人接梗好啦！不過應該的士都好方便冇咁驚吖麻
这 次 出 差 又 真 的 很 辛 苦 ， 手 手 脚 脚 都 黑 青 了 !!! 酒 店 四 周 都 很 美 ~
回覆刪除[版主回覆02/15/2012 08:39:31]是很美。。。不過很想快點回家！
雪境好靚！啲傷好返未？
回覆刪除[版主回覆02/15/2012 08:40:53]差唔多啦！不過後腦仲有小小痛
wa! 睇您轉車就暈囉! 如果廿年前的禾就好刺激, 而家就怕怕囉, 點都好, 難忘的回憶
回覆刪除[版主回覆02/15/2012 08:42:35]我一早就怕怕，冇計搵吃頂硬上啦！鬼叫我窮呀！
會有後福^^
回覆刪除[版主回覆02/15/2012 08:43:22]承你貴言！！！
我去德國個間酒店都係咁！
回覆刪除[版主回覆02/15/2012 08:47:12]美人，自由行同搵食係唔一樣的！
ｄ公仔好應景！ 這排下大雪無計喎！ 坐超十個鐘公趕， 以前一年有至少兩次。 現在少點。 視像～ 冬天吃ｐｒｅｔｚｅｌ我不太喜歡， 要好熱熱室內ｏｋ！
回覆刪除[版主回覆02/15/2012 08:58:26]我返黎先開始暴雪，都算好彩啦！我好憎去囉！
地方好令, 但你真係跌得好傷喎, e+好番未呀?
回覆刪除[版主回覆02/15/2012 18:14:25]差唔多啦！仲爭小小，不過唔知有冇其他問題例如顛左或神經之類囉！個頭有小小痛！
畢生難忙嘅旅程，慕尼黑 D 酒店又幾靚喎！但係好似無餐好食，吉吉鍾唔鍾意食鬼佬罐頭呀 ?
回覆刪除[版主回覆02/15/2012 18:16:38]一定唔會唔記得呀！吉吉愛到暈，不過第二日爛便！-_-!
d景真係好靚 ^^ 妳跌得真係好傷喎，慘慘 @.@
回覆刪除[版主回覆02/15/2012 18:17:41]超慘，咁大個人都未有咁傷過吖！
哈.......吉包豆媽....我噚日已經睇咗啦...不過呢我未有時間留言......聽住......你下次咪制呀...分分鐘死人嫁.......你知唔知道冬天同様有唔同嘅動物出現...萬一視您為獵物...咁就大鑊....重有...嗰d山路完全比雪覆蓋...分分鐘有d 洞口你睇唔到...萬一跌咗落去...等到人黎救你起碼幾個鐘後嘅事...d 傷好反未...要查清楚.....咁傷驚有手尾....
回覆刪除[版主回覆02/15/2012 18:20:54]我諗返轉頭都覺得我其實可以再黑仔D，可能連命都冇！！冇下次啦！最多唔撈，命仔緊要呀
！而家都仲猶有餘悸呀！
真係好慘吓……..我試過係澳洲膽粗粗跟朋友上咗雪山滑雪, 但係上到去要滑落嚟嗰吓, 我真係好驚, c 都唔肯自己滑落去 ! (如果唔識c 滑落嚟,可能仲傷過你?!) 雖然我算識溜冰同踩 roller, 但滑雪我就覺得連係平地都好難整停佢……. 滑雪 / 坐雪車落山太高速度喇,未學過真係好易有危險架 ! 你都好大膽喎 !
回覆刪除[版主回覆02/15/2012 18:27:18]事前一D都唔知要滑落黎架，如果知我一定唔會去食飯！果個情況根本冇得揀，又冇人係兩個一架車。。。只可以屎頂，冇膽鬼即刻變左大膽女！
Yeah~~~天無絕人之路, thanks LORD
回覆刪除[版主回覆02/15/2012 18:28:02]真係！感謝主！
陰公.....差啲條命仔俾埋佢.....俾着我啲老嘢，肯定唔係瘀咁簡單.....係骨折。
回覆刪除[版主回覆02/15/2012 18:32:02]我係不幸中既大幸，真係有可能冇命！
雖然好同情你既遭遇，但sorry，真係笑咗！而家好番晒未呀？！不過你好叻，去咁遠公幹，我真係無咁既機會嘞！你去德國講乜野話架？德國佬成日扮唔識聽英文，你同佢地講德文？？
回覆刪除[版主回覆02/15/2012 22:44:38]仲爭小小先好返呀！今次有十幾國唔同既蛋散去，所以佢地唔可以扮唔識英文呀！我地大家都係用有限既英文交流架！你轉工去歐洲公司咪有機會囉，不過絕對唔係開心野囉要去既話！橫樹你同我一樣有厭惡返工症候群。。。哈哈哈！
陰公囉.....瘀成咁肯定好痛喇！總算有驚無險...
回覆刪除[版主回覆02/15/2012 22:45:59]真係謝天謝地呀！嚇屎左！
好驚險啊！
回覆刪除[版主回覆02/15/2012 22:46:52]真係堅驚險牙！
♥ ~ ~ ~ Happy Valentine's Day ~ ~ ~ ♥
回覆刪除[版主回覆02/15/2012 22:47:26]情人節快樂！
The way u wrote it, I could not help laughing. but I could really sense the tiredness, how frighten and cold it could be.... Glad u made it safely back..... hahaha
回覆刪除[版主回覆02/15/2012 22:49:35]真係嚇屎冇命賠架。。。好彩返倒黎咋！
pomme frites 都9歐羅?!
回覆刪除[版主回覆02/17/2012 18:51:20]哩D就叫做貴到嘔啦！咦！你咁叻識睇德文既？你學果D唔係法文咩？
地方好靚，不過就好驚險！下次話自己有哮喘推左佢！
回覆刪除[版主回覆02/19/2012 23:49:43]希望下次事前肯佢地講我知。。。
嘩....乜咁搞法呀？你算硬淨嘞, 我可能跪咗喺雪地度由佢涷死算嘞...XDD 講笑啫...
回覆刪除[版主回覆02/22/2012 08:50:14]我果刻都覺得自己好勁！一向比人笑冇膽匪類加麻！
風景唔錯呢, 不過咁凍......同埋仲要攪到一扑一碌咁慘
回覆刪除[版主回覆02/28/2012 19:51:04]其實凍唔係問題，慘在唔夠好彩囉！
D 風景好靚，不過攪成咁，好彩有信念堅持，如果唔係，點返嚟見仔仔！
回覆刪除[版主回覆02/28/2012 19:53:24]真係有屎過番生既感覺！
趺得都好傷WOR, 好彩冇事, 真係一額汗
回覆刪除[版主回覆02/28/2012 19:55:17]好彩好彩呀！心都離埋呀！
好彩最後都冇事咋! 真係鄧你一額汗呀.... 比著我實C得, 又黑又唔認到路, 實嚇瓜柴.
回覆刪除[版主回覆02/28/2012 19:56:48]真係有十個驚架！極度恐慌呀！面都靑埋
唯有視為另類經驗, 不過唔好有下次
回覆刪除[版主回覆02/28/2012 19:58:32]冇可能有下次啦！命仔緊要呀！
嘩，你對腳好可憐呀。
回覆刪除[版主回覆03/02/2012 08:49:08]其實係左手左腳同後腰。。。。慘爆！
我地由始至終無需入飛入閘但係冇人問過我地查飛。。。咁！咪好多人唔會買車飛囉？唔明！
回覆刪除吓, 咁好, 我去過德國三次, 次次都有人查飛架喎, 你好LUCKY! HEHE
[版主回覆03/30/2012 22:01:00]最衰吉爸好憎坐長途機，唔係都可以侯特價機票。。。
[叻叻回覆03/30/2012 17:51:20]其實最重要係近幾年d 特價機票都去德國,所以我就會去德國d小鎮和去附近的國家玩,咁自己都覺得德國 d小鎮都好靚都好中意.哈哈,講真.我覺得法國人更懶! hehe........
[版主回覆03/30/2012 08:39:01]做咩去咁多次呀？你好鐘意德國架？
可能我地早啦六點幾開始坐地鐵火車。。。德國佬咁懶未開工瓜！
你隻腳真係好瘀呀, 陰功~!
回覆刪除[版主回覆03/30/2012 08:41:22]我老公問我係咪咁大個人最傷哩次，又的確係！
跌成咁真係慘呀！
回覆刪除[版主回覆04/11/2012 15:12:46]而家諗起仲猶有餘悸呀！