雞雞的魔力

 

講起哩隻雞雞…我想起個朵比佢叫 “神奇魔力雞雞粒”! 個樣好普通…普通既雞胸肉咁既樣不過係乾既…應該係用烤既形式整成既… 烤味好香….



吉吉食過之後…. 好恐怖~~~ 好似道友愛上白粉咁…愛到天昏地暗…日月無光… 發誓一定要排除萬難同雞雞喺埋一齊咁…..起初我地係用黎獎勵佢受洗耳滴藥之苦…. 按時按候攪完耳仔就比佢食… 先講返第一日…



話說喺個幾月前….第一日食過雞雞後…, 我地實在百密一疏同疏於防範冇扣好密實箱個蓋…. 結果第二朝……………………作死囉….成袋雞雞由飯廳既密實箱(家居放雜物用, 到膝頭哥咁上下高1.5呎x2.5呎x1.5呎既size)裡面走咗出黎喺客廳既地毯上面, 袋中間穿咗… 有被強行咬爛既痕跡… 地下有好多雞雞碎… 茶几底有舊小小濕濕地疑似被口水浸過既雞雞…崩咗小小…. 應該係太大舊冇辦法食所以放棄咗…又或者食得太多食滯咗… 跟手發現小偷應該曾經手忙腳亂過一輪…因為梳化底都有雞雞一大舊… 到底食咗幾多先停手都唔理啦…但係佢係點樣將大約300g既雞雞從一個有深度既箱裡面攞出黎再拖到理想位置食既呢…?  係一個迷…!!!!!



開頭喺開放式既廚房搣開小小塊比佢食…佢情緒就會好高脹… 嫌我整得慢… 等唔切就已經跳咗上廚房個工作台成個頭質哂落去食…仔呀…等一陣啦… 好快得啦… !!!! (言間已經試住推開佢…) 唔理唔埋食咗先食咗先….我之後用手遮住D雞雞唔比佢食住…佢就當我隻手係雞雞… 一啖咬落黎…好鬼痛….之後吉爸抱開佢先可以安全咁搣細D雞雞比佢食… 為咗唔啃死你個衰仔… 就要受你一啖啦…可憐天下父母心呀…冇陰公~~~~

魯吉: 媽媽...妳唔係懷疑我吖麻...?  我一直喺度訓緊覺喎... 我個竇好暖架...可以證明我一直喺度架...我有不在場證據...